Þegar dimmir, kreppir að, margt verður mótdrægt í samfélagi Íslendinga er ljómandi að snúa bökum saman og halda veislu i kirkjunni. Starfsfólk Neskirkju, sjálfboðaliðar s.s. fólk i kórum og ráðum, efndi til vetrarhátíðar 11. nóvember. Hópur fólks eldaði, aðrir sáu um dagskrá, skreytingar og skemmtiatriði. Þessi samfélagshátíð efldi hug, kynni og veitti ljósi inn í líf okkar. Maturinn var góður. Veislan í kirkjunni má gjarnan halda áfram í heimahúsum. Uppskriftin er því hér að neðan.
Limebakaður fiskur með graslaukssósu.
Uppskriftin er auðveld og hentar ágætlega bæði fyrir gestaboð sem og heimilismáltíð. Vert er að vinna sósuna nokkrum klukkutíum fyrir máltíð eða jafnvel deginum áður.
Uppskrift ætluð 4
2 laxaflök, 800 til 1 kg. hvert, roðflett og beinlaust
8 stórar heilhveitibrauðsneiðar
1 dl rifinn óðalsostur
1 tsk oreganó
1 tesk tímian
1 tesk salt
rifinn börkur af 2 limeávöxtum (þ.e. límónum)
safi úr 1 limeávexti
2 hvítlauksrif, pressuð
15o g smjör
Stillið ofninn á 200 gráður. Smyrjið stórt eldfast fat og leggið laxaflökin á fatið og saltið fiskinn. Setjið brauðsneiðarnar, ostinn, kryddið, börkinn og safann af limeávextinum og pressaðann hvítlaukinn í rafmagnsblandara og tætið vel í sundur. Látið vélina ekki ganga of lengi, þá verður brauðið blautt. Dreifið mylsnunni jafnt yfir laxaflökin. Bakið í 15 mínútur. Takið flakið úr ofninum og setjið smör í litlum bitum ofan á.
Berið laxinn fram með graslaukssósunni, ofnbökuðum kartöflubátum og salati ef vill.
Graslaukssósa
200 ml majones
200 ml sýrður rjómi
1 dl smátt klipptur eða saxaður graslaukur
2 msk smátt söxuð steinselja
1 tsk oreganó
ferskmalaður pipar og cayaenne pipar á hnífsoddi
safi úr ½ limeávexti (þ.e. safi ur hálfri límónu)
Blandið öllu vel saman og kælið helst í a.m.k. 3 klst.
Þegar efnt er til veislu í kirkju eða kirkjulegu samhengi er vert að lesa eða endursegja söguna um fiskidráttinn mikla í Lúk. 5. Fiskur er gamalt Kriststákn, sem kristnir menn frumkirkjunnar teiknuðu í sandinn til að tjá á hvern þeir tryðu. Og kirkjan er kölluð til veiða í margvíslegum skilningi. Bragðgóður kirkjufiskur hentar í kirkjusamhengi og hefur í sér heilnæma merkingardýpt sem tjáir hlutverk kirkjunnar í veröldinni.
Bæn: Þökkum Drottni því að hann er góður, því miskunn hans varir að eilífu.
Leggið út á djúpið. Verði ykkur að góðu.