Nærri hundrað manns nutu biblíumáltíðar í Neskirkju í dag. Dómstólaráð hélt framtíðarþing sitt í safnaðarheimilinu og framtíðarhópur kirikjuþings hélt fund um kirkju og framtíð. Kjúklingur sem María í Nasaret hefði getað eldað var á borðum. Undursamleg lykt fyllti safnaðarheimilið og spurningar hljómuðu: „Get ég fengið uppskriftina, ég vil gjarnan elda þetta um helgina.“ Uppskriftin er á vef Neskirkju. Maríukjúllinn er eins og annar Biblíumatur, hollt heilsufæði. Uppskriftin er að baki smellunni.
Maríukjúklingur
f. fjóra
4 kjúklingabringur
4-6 hvítlauksgeirar
1 tsk kúmmín
1,5 tsk túrmerik
1 tsk kanill malaður
Salvía, helst fersk annars þurrkuð
1 stór rauðlaukur
3 skalottulaukar (sbr. Askelon en líka oft kallaður vorlaukur á íslensku)
Sítrónubörkur rifin með rifjárni
Safi úr einni sítrónu (helst lífrænni) ca 70 ml. má líka vera appelsínubland
150 gr. spínat
300 ml. grænmetiskraftur
10 döðlur langskornar. Mega líka vera fíkjur/sveskjur í staðinn.
Maldonsalt
Heslihnetur til skreytingar
Maldonsalt og olía á heita pönnu. Kjúklingurinn á pönnuna og meira maldon yfir sem og salvían. Laukurinn skorinn fínt og steiktur, settur við hlið kjúklingabitanna. Kryddað yfir allt og sítrónubörkur yfir. Ekki síðra að leyfa síðan standa í sólarhring í kæli. Sítrónuvökvi, spínat og hnetur yfir og síðan fært í ofn eða pott og látið malla í fjörutíu mínútur. Gæta að vökvinn fari ekki allur, bæta við vatni ef sósan er að verða of þykk. Borið fram með soðnu bulgur (eða byggi eða kúskús).
Borðbæn: Þökkum Drottni þvi að hann er góður, því að miskunn hans varir að eilífu. (Sálm 106.1 og 107.1).